اداکارہ قطرینہ کیف اب فلم سازی کے میدان میں قسمت آزمائی کے لیے تیار ہیں۔
بالی وڈ میں اداکاروں اور فنکاروں کا کامیابیاں حاصل کرنے کے بعد فلم ساز بننا نیا نہیں ہے۔ قطرینہ کیف سے قبل یہ کام انوشکا شرما اور پرینکا چوپڑہ کامیابی کے ساتھ انجام دے چکی ہیں۔
قطرینہ کیف اپنے پروڈکشن ہاؤس سے اپنی چھوٹی بہن ایزابیل کو لانچ کرنے کا منصوبہ رکھتی ہیں۔
اخبار ممبئی مرر کےمطابق انھوں نے اپنے سابق دوست اور فیملی فرینڈ سپرسٹار سلمان خان سے ‘اس کے متعلق تفصیل سے گفتگو کی ہے۔’اطلاعات کے مطابق وہ اپنے ‘ہدایت کار دوستوں کے ساتھ فلموں کی کہانیوں پر بھی غور کر رہیں’ تاکہ مناسب کہانی کے ساتھ وہ اپنی بہن کو اپنے پروڈکشن ہاؤس کے بینر سے لانچ کر سکیں۔
پہلے یہ خبریں گشت کر رہی تھیں کہ سلمان خان ان کی بہن ایزابیل کو لانچ کریں گے۔ خیال رہے کہ قطرینہ کیف کو بھی سلمان نے ہی فلم انڈسٹری میں لانچ کیا تھا۔
ویسے سلمان خان نے حال ہی میں کئی نئے اداکاروں کو لانچ کیا ہے جس میں آدتیہ پنچولی کے بیٹے سورج پنچولی اور گوندا کی بیٹی بھی شامل ہیں۔
حال ہی میں ایزابیل کو قطرینہ کیف کے ساتھ کئی پارٹیوں میں شرکت کرتے دیکھا گیا ہے اور اس کے بعد سے ہی ان کے بالی وڈ میں قدم رکھنے کی باتیں گشت کرنے لگیں۔ ویسے ابھی وہ برطانیہ میں مقیم ہیں اور وہاں ماڈلنگ اور اداکاری کرتی ہیں۔
انوشکا شرما نے این ایچ 10 پروڈیوس کیا تھا جبکہ اب ان کی فلم فلوری بھی آنے والی ہے۔ جبکہ پرینکا چوپڑہ نے تین علاقائی زبانوں کی فلمیں پروڈیوس کی ہیں لیکن ابھی انھوں نے ہندی فلم میں قسمت آزمائی نہیں کی ہے۔
